കല്ലുകള്‍ കല്ലുകളായിരിക്കട്ടെ
അവയെ അപ്പമാക്കാനോ
അപ്പം തരുന്നവനാക്കാനോ
ശ്രമിക്കാതിരിക്കൂ
പുല്ലുകള്‍ പുല്ലുകളായിരിക്കട്ടെ
അവയെ പുണ്യമെന്നോ
പുണ്യം പൂക്കുന്ന മലകളെന്നൊ
കരുതാതിരിക്കൂ
കാടുകളില്‍ ദൈവം
വസിക്കുന്നില്ല ;
അഥവാ ഉണ്ടെങ്കില്‍
അവനെ കാട്ടാളന്‍
എന്ന് വിളിക്കുന്നതിലെന്ത്?
നഗരങ്ങളിലെത്തിരക്കിലലയുന്നുണ്ട
ദൈവമെങ്കില്‍
അവനിപ്പോഴും
ആചാരങ്ങള്‍ പരിഷ്കരിക്കാത്തതെന്തേ ?
എന്റെയും നിങ്ങളുടെയുമുള്ളില്‍
അവനുണ്ടെങ്കില്‍
നാമെന്തിനാണ്
രാക്കാറ്റിനെ എനിക്കും നിനക്കുമെന്നു
ഇരുജാലകങ്ങളിലൂടെ കൈ നീട്ടുന്നത് ?
കല്ലുകള്‍ കല്ലുകളും
പുല്ലുകള്‍ പുല്ലുകളും
കുട്ടികള്‍ കുട്ടികളുമായിരിക്കട്ടെ
മുതിര്‍ന്നെന്ന് കരുതുന്നവരേ
അല്പം വഴിമാറി നടക്കൂ .
ഞങ്ങളീ മുയല്ക്കുഞ്ഞിനെവീടെത്തിക്കട്ട
മഞ്ഞു പെയ്യുകയാല്‍
അവള്‍ക്കു തണുക്കുന്നു
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ