ജനാല

------------

മഴ പെയ്യുന്നതു കാണാനായി

മാത്രം ചില ജാലകങ്ങൾ

തുറക്കുന്നുണ്ട്‌ നാം

മറ്റു ചിലപ്പോൾ

ആകാശം കാണാൻ,

ശുദ്ധവായുവിനെ

അകത്തേക്കു ക്ഷണിക്കാൻ

പുറത്തെവിടെയോ കൂകുന്ന 

കുയിലിനെ കാണാൻ,

ചുവന്ന വെയിൽ

തിളങ്ങുന്നതു കാണാൻ

ഇവിടൊരു കൂട്ടം

പുസ്തകങ്ങൾ

അവ നിറയെ ജനാലകൾ

വേണ്ടതൊക്കെ കാണാൻ

അവ തുറക്കുകയേ വേണ്ടൂ

രാജ്യങ്ങൾ അതിർത്തിപോലും

മറന്നയീ കാലത്ത്

ലോകാധിപൻ

ലോകം ചുറ്റാനിറങ്ങുന്നൊരാളോട്‌

അതിരുകളെക്കുറിച്ചും

അരുതുകളെക്കുറിച്ചും 

പറയുന്നവരെ ഒരു ചിരിയിലൊതുക്കി

അയാൾ യാത്ര തുടങ്ങി

ആദ്യം ഭൂതകാലത്തിലേക്ക്‌

അയാൾ നടന്നുപോയി

പോയ വഴികളിലൂടെയല്ല

പോകാൻ ആഗ്രഹിച്ചിരുന്ന വഴികളിലൂടെ

തിരിച്ചു നടക്കേണ്ട ആവശ്യമുണ്ടായിരുന്നില്ല

ആ വഴി മുന്നോട്ടു നീണ്ടുവന്ന്

അയാളുടെ വർത്തമാനകാലത്തിൽ മുട്ടിനിന്നു

ഭാവികാലം എന്നത്‌

വെറുമൊരു സ്വപ്നമായിരുന്നു

നടക്കാതെ പോയ ഭൂതകാലത്തിന്റെ 

കളർച്ചിത്രം

അയാളിപ്പോൾ

ലോകം മുഴുവൻ

കീഴടക്കിയ ഒരാളാണു

സ്വന്തം ലോകം

മറ്റൊരാൾ കൈയടക്കുമ്പോഴല്ലേ

നാം തോറ്റുപോകുന്നത്‌