പരിഭാഷ

എന്റെ വാക്കുകൾ

ദൂരെയൊരു ഭൂഖണ്ഡത്തിലിരുന്നു

ആരൊ എഴുതിയവയുടെ പരിഭാഷയാണെന്ന് ആരൊക്കെയോ കരുതുന്നു

ലോകമനസിന്റെ ചിന്താധാരയിൽ നിന്ന്

ഒരു തുടം അവരും

ഒരു തുള്ളി ഞാനും

കോരിയെടുത്തതാവാം

വിശേഷപ്പെട്ടതായി അതിലൊന്നുമില്ലെങ്കിലും

ശ്ശ്രദ്ധിച്ചില്ലെങ്കിൽ

ആ ചിന്താശബ്ദം

നാം കേൾക്കാതെ പോകാം

ഏതു ഭാഷയിലെ

ശബ്ദകോശമെടുത്താലും

തണുക്കുമ്പോൾ

ചൂടുപുകയ്ക്കുകയെന്നത്‌

ഒരേയൊരു ചൈതന്യമാണു

മാന്ത്രികവാക്കുകൾ

വാക്കുകൾക്ക്‌ മാന്ത്രികശക്തിയുണ്ട്‌

ഒരു നിമിഷം മൗനമായിരുന്നു നോക്കൂ

വാക്കുകൾ പുഞ്ചിരിയായൊ

നനുത്തൊരു ആശ്ലേഷമായോ

വേഷം മാറും

പൂക്കളുടെ സുഗന്ധം പേറുന്ന ആശംസയായോ

ബലൂണുകളുടെ ഉള്ളിൽ നിറയുന്ന നിശ്വാസം പോലെയോ

കൈമാറ്റം ചെയ്യപ്പെടും

ഒരമ്മയുടെ കവിത

അവളുടെ കുഞ്ഞാണു

പ്രണയിക്കുന്നവന്റെ കവിത

പ്രണയിതാവും