ചിലന്തിവലപോലെ
നെയ്യപ്പെട്ട
നിരവധി ലോകങ്ങളുടെ
നാരതിർത്തികൾക്കുള്ളിലാണു നാം
ഒരു ലോകം,
അതിനുള്ളിൽ
വൃത്തത്തിലെ ആരക്കാലുകൾ
തമ്മിൽച്ചേർന്നുണ്ടായ
ദളങ്ങൾ പോലെ
നിരവധി ലോകങ്ങൾ
എനിക്കൊരു ലോകം
എനിക്കും നിനക്കും ചേർന്ന് നമ്മുടേത്‌,
എനിക്കും അവർക്കും ചേർന്ന്
ഞങ്ങളുടേത്‌,
നിനക്കും അവർക്കും ചേർന്ന് നിങ്ങളുടേത്‌,
എത്ര ലോകത്തിന്റെ നിയമങ്ങൾ,
എത്ര ലോകത്തിന്റെ കുരുക്കുകൾ
നിമിഷം തോറും
ഓരോ ലോകത്തിലേക്കും ചുവടുമാറ്റിവച്ച്‌
അതിവിദഗ്ദമായി ജീവിതമാടുന്ന
നർത്തകരാകുന്നു നാം
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ